يا جماعة عاوز أذاكر بأه

بصوا بأه انا بقولها وانا مش
خايف من حد .... بقولها ورزقي
علي الله ..... ايوه انا عاوز اذاكر _ هدوء لو سمحتم عشان دي مش نكتة - انا بجد عاوز اذاكر نقضيها اجتهاد بأه وعلي فكرة انا مش لوحدي دا في زيي كتيييييييييييير - الاخوة الاباء يركزوا في الحتة اللي جاية الله يكرمكم - بس المشكلة مش فينا خالص المشكلة اننا مش لاقيين وقت نذاكر فيه وتعالوا نحسبها بالورقة والقلم............
السنة فيها كام يوم ؟
365يوم
- منهم 60 يوم اجازة الصيف يتفضل 305
- 8 ساعات نوم عميق كل يوم يتبقس 183
- 52 جمعة يتبقي 121
- اجازة نص السنة والاعياد القومية والدينية الخ .... قول 40 يوم يتبقي 81 يوم
- ساعة واحدة للعب كل يوم ( الواحد لازم يرفه عن نفسه برضه ) يتبقي 66 يوم
- ايام المرض ( انفلونزا شتوية وصيفية وبرد والآم اسنان وصداع وداخلين علي انفلونزا خنازير ربنا يستر ) قول 10 ايام يتبقي 56 يوم
- ساعتين اكل كل يوم مع مرأعاة المضغ الجيد للطعام , يتبقي 26 يوم
- متابعة الاخبار العالمية والمحلة - الثقافة مهمة برضه - قول اربع ايام في السنة يتبقي 22 يوم
- ممارسة الرياضة لمدة ساعة واحدة يوميا - العقل السليم في الجسم السليم - يتبقي 17 يوم
- زيارات داخلية وخارجية وضيوف خارجة وضيوف داخلة - صلة الرحم يا جماعة - قول 3 ساعات اسبوعيا يتبقي يوم واحد
- واليوم ده عيد ميلادي ..... اذاكر فيه يعني
وكل سنة وانا طيب .

- تم نشر هذه التدوينة بمناسبة العودة الغير سعيدة للعام الدراسي الجديد