قناة النيل - لا مؤاخذة - الثقافية

طيب وايه اللي يخلي واحد ابن ناس ومحترم زي حلاتي - شايفك ياد ياللي بتضحك ورا انت-  يشوف قناة النيل الثقافية ... اقولكم .... اصل انا ليا واحد صاحبي جدع اسمه عبدالله مجدي وهو - منه لله اللي كان السبب - كان مستضيفينه في برنامج  كده اسمه IT حاجة و بيتذاع يوم الجمعة الساعة 3 العصر وطبعا عشان عبدالله صاحبي وعشان هيطلع يتكلم عن مشروع اشتغلنا فيه سوا فقلت اعمل باصلي -  واخد بالك انت ياللي ف بالي- واتفرج عليه ... نهايته ظبطت منبه الموبيل عشان يفكرني بالمعاد مهو يعني مش كل يوم هشوف واحد صاحبي في التلفزيون لا وايه فضائي يا معلم عشان الدول الشقيقية والصديقة تتفرج علينا .... المنبه رن قمت دورت ع القناة وتعبت ع بال ما لقيتها لاني عمري ما غالطت نفسي واتفرجت عليها من ساعة ما اغتنينا وجبنا الدش ,نهايته لقيت القناة ولقيت البرنامج بدء وعبدالله وواحد زميلنا تاني قاعدين مع البيه المذيع ... قعدت انا كمان عشان استمتع باللقاء حاولت اتغاضي عن الديكورات التي تعود لبدايات اختراع الاستديوهات التي زين بها البرنامج وقلت عادي يمكن زوقي الفني فسد او خد اجازة - مش النهاردة الجمعة برضه - فجأة لقيت الصوت علي جدا دورت ع الريموت عشان اظبطه لقيته اتعدل- دا مرعب باه وانا مش واخد بالي- شوية والصوت ضعف جدا ودورت ع الريموت عشان اشوف - واضح اني مش مرعب ولا زفت- واتكرر الموضوع ده يا معلم اكتر من مرة طول الحلقة ... هماا اخوانا البعدا مسمعوش عن حاجة اسمها انظمة الصوت الرقمية ... طيب حاولت انسي كل ده وقلت ضعف امكانيات وحاولت اركز مع الواد المزيع ويا ريتني ما ركزت .... اموت واعرف انهي زريبة اعلام اللي طلعت ده دا حتي معلمهوش ادب الحوار العادي وان عيب تقاطع ضيوفك كل ما يتكلموا بالشكل البشع ده وتحاول تفرض عليهم كلامك عشان يقولولك امين ... دا غير نطقه لبعض الكلمات الانجليزية والعربية بلكنات اجنبية ... يا عيني البيه بيستعرض قدراته اللغوية علينا طيب ... شوية وبدات التلفونات ... نفس الحوار الغبي المذيع بيقاطع المتصلين بشكل فج ووقح وكانه مأجرهم - بفلوسي يا جزم اخلصوا وقلولوا الكلمتين اللي انا عاوزهم وبلاش استنصاح- ويا عيني عبدالله وزميله قاعدين مش عارفين يعملوا ايه في الكائن ده .... بشكل لا شعوري سرحت منهم وقلت مش غريب علي بلد زي مصر وصلنا فيه بالمثقفين الي الحظائر - واسمع احلي سلام  للفنان الدكتور الاستاذ الوزير فاروق حسني - ان يكون ده حال القناة الناطقة باسم الثقافة والمثقفين ولكن اللي تعبني اكتر ان المذيع المتخلف ده وامثاله  بياخد مرتبه من الضرايب اللي انا وانتو بندفعها ..... شوية ورجعت من سرحاني لقيت نفس الحوار زي ما هو ... انا راجل صاحب عيا ومرارتي مبتستحملش سيبت التلفزيون وقمت ويا رب عبدالله يسامحني .