الف حمد الله علي سلامة مصر

 الف حمد الله علي سلامة مصر ... 

مصر اللي بجد

مصر التاريخ والحضارة 

مصر الاصالة والعراقة 

مصر اللي رجعت بأيدين شبابها

مصر اللي فتحت صفحة جديدة وف اول سطر كتبت العنوان

كتبتها بدماء اطهر واجمل ورد فتح في جناينها

كتبه حرية

كتبته مدنية

كتبيه مجد وعظمة وعزة وكرامة

......................

 مصر من النهاردة بلدنا

بعد ما كانت بلدهم

بلدنا بجد

هنبنيها وهنحافظ عليها هنحميها

هنحطها في عنينا عشان منضيعش دم اخواتنا هدر

من النهاردة مش هنفرط في حقنا

من النهاردة انت وانا حراس للبلد دي 

من النهاردة مفيش فساد 

مفيش ذل

مفيش تعذيب

مفيش تزوير

مفيش مبارك

من النهاردة كل مصر هتبقي ميدان تحرير كبير

والناس اللي ماتوا في عيون مصر محفوظة صورهم

وعلي قلبها محفورة اساميهم

بحروف من نور

مصر مش هتنساكم ولا احنا هنناسكم

وبنوعدكم

هنكمل المشوار

ومصر هتبقي زي منتو كنتوا عاوزين تشوفوها

مصر قوية

جديدة 

نقية

.....................

 مش هنتكلم كتير عشان دا مش وقت كلام

 دلوقتي كلنا هننزل ونشتغل بايدينا

وهنخلي بلدنا اجمل وافضل بلد في الدنيا

بلدنا كانت تايهة مننا ورجعت 

كانت محبوسة في زنزانة من زنازينهم

 بس خلاص

اتحررت

الف حمد الله ع السلامة يا مصر

بجد بجد وحشتيني