#GoodEgypt

الهاش تاج احدي اروع مميزات موقع التدوين المصغر (تويتر) حيث يستطيع عدد لا نهائي من الاشخاص المشاركة في انشاء قناة اعلامية حول موضوع معين باستخدام كلمة مفتاحية وعلامة الهاش (#) لينهوا بها تعليقاتهم ليستطيع اي شخص الوصل الي هذا التعليقات جميعا والتي تنتهي بنفس الهاش تاج بضغطة زر ..... طيب لنتجاوز هذه المقدمة المملة ولندخل في الموضوع ...منذ اسابيع اطلق قاطني تويتر احد احب الهاشتاجات الي قلبي وهو  #GoodEgypt حيث اتفقوا علي كتابة جملة عن شئ جميل في مصر وتزييلها بالهاش تاج المزكور وكانت من اروع حفلات توتير التي شاركت فيها وقلت اغلس عليكم واجيبلكم مساهماتي في الحفلة :
- اغنية قديمة لمحمد منير انت بتحبها وليك فترة مسمعتهاش وتلاقي حد مشغلها في كافيه انت قاعد عليه #GoodEgypt
- بيتنا التاني .... كشري جحا احسن محل كشري في صعيد مصر #GoodEgypt
- سور الازبكية وريحة الكتب القديمة والبياع اللي شاف الشنطة اللي في كتفك فافتكرني صيد سهل وممكن يثبتي بسهولة في الاسعار #GoodEgypt
- المدرس بتاعك في اعدادي اما تقابله وتكتشف انه لسه فاكرك ويسالك طب وانت وصلت فين دلوقتي ؟ #GoodEgypt
- لما تقابل واحد صاحبك مشفتوش من فترة طويلة بالصدفة في احتفالية في نقابة الصحفيين وتبقوا مبسوطين بالاحتفالية وباللقاء #GoodEgypt
- امك وهي بتقولك البيت كان فاضي من غيرك وانت راجع من السفر #GoodEgypt
- شوارع وسط البلد اللي بتوحشني وبوحشها لما اغيب عنها #GoodEgypt
- الحلاق بتاعك اللي بيفهم في السياسية وفي الكورة وفي الدين وفي الطب #GoodEgypt
- د.احمد خالد توفيق ومشوار نجاح بداناه معه ليتربع علي عرش كتاب الشباب في الوطن العربي #GoodEgypt
- لما تكون تايه وتلاقي حد جدع بيتبرع انه يوصلك للمكان اللي انت عاوزه رغم ان ده مش طريقه اصلا #GoodEgypt
- ابراهيم عيسي وكل رجالة الدستور #GoodEgypt
- زحمة المترو وانا راجع من سور الازبكية في العتبة وشايل يجي 50 كيلو كتب #GoodEgypt
- سواق التاكسي اللي مصر يسمعك نكت بايخة وقديمة لحد ما توصل المكان اللي انت رايحه #GoodEgypt
- وديييييييييييييييع و تهامي باشا و........ مدام رشا طبعا #GoodEgypt
- صاحبك اللي كل واحد فيهم في راح محافظة مختلفة وبتتقابلوا مرة كل سنتين #GoodEgypt
- ايام ثانوي اما كنا بنزوغ م الدروس الخصوصية #GoodEgypt
- قعدة البورصة في الشتا والبرد مخلينا بنتكتك #GoodEgypt
- انت راجع متأخر بالليل وابوك كالعادة بيهزقك #GoodEgypt
- طبق الكشري مع اصحابك في توم اند بصل وانت اللي هتحاسب طبعا #GoodEgypt
-  منظر البيوت الغافية في الظلام علي جانبي الطريق وانا راجع بالليل متأخر في الميكروباص #GoodEgypt